مكنتاش كدا اتغيرته

مكنتاش كدا اتغيرته،والله المسؤولية تغير كدا لماتجي ضربة الحظ فجأة وعلى غفلة تلاقي واحد كان عطيله،هبيله،سليخه.

قده في يوم وليلة مسؤول ومعه حراسه ومرافقين وحشم وخدم ودا يحمل له القات ودا يقرب له الشراب وداك يساني له المتكى ودكرونا بمبرز عبدالباري في حافة الصباغين ومبرز محمد راشد وباسويد ايام عدن زمان بس الفرق ان المبارز حق زمان كان فيها رجال تحترم ونخب تشرف من مثقفين وادباء وشعراء وسياسين ومدرسين ونقابين وفنانين وكثير من المبدعين.

كانوا رجال كل واحد منهم مالي مكانه ومنصبه ولا مرافقين ولا دجالين ولاحمالين ولا حرسات كانوا رجال بمعنى الكلمة عدانيه بحق وحقيق بسطاء متواضعين وفيهم العفه و العزه وفيهم خفه الدم وسرعه البديهة  وخفيفي الظل رجال مزجوا بين الجد واللعب وكتبوا وارخوا تاريخ عدن.

نرجع لصاحبنا ونقول له مكنتاش كدا اتغيرته كنت ممخطط وملجج ومسعبب تمسح مخاطيطك بصدر الشميز واليوم قدك على مرافقين ايش اللي حصل والله مش حسد ولاغيره ولاحقد بس سمعتك مره تتكلم مع مواطن وتقول انا كدا ديكتاتور لدا استغربت وقلت لنفسي مكنتاش كدا اتغيرت ياسبحان الله انا اعرفك انك هبيله ومقتنع انك الفكر والفهم الذي تحمله فهم واحد سبهلل وكيف لما يعينوك في منصب وخلوك تتحكم بمصاير الناس وتعبث بمصالحهم واكبر دليل ان كل ماتقوم به اعمال فاشله واضهرت انعاكسها السلبي على حياة المواطنين في هده المدينه.

يامسكين وقعت مع شكله يطبلوا لك ومثل البهيمه  يزفوك وأنت راح وأنت جاي وخلوك تشوف نفسك مثل هارون الرشيد وهم يحدثوا انفسهم يقولوا صدق نفسه الهبيله( هم يقولوا كدا) وفي هدا الجانب هم صادقين مع انهم اكذب وافسد خلق الله.

المهم المتضرر والتعبان المواطن الذي جابتك الظروف وفرضتك ان تكون عليه مسؤول.

وانا مكاننا مندهش ومستغرب انك مكنتاش كدا اتغيرت قدك تتكلم بالسياسة والإقتصاد وياصور حني بالكورجه والعمل عمى ولا شفنا منه شيء محلك سر طيب يارئاسة الجمهورية ويارئاسة الوزراء كل الكوادر والنخب والشخصيات والخبرات الموجوده في هده المدينه ولا واحد منهم اعجبكم ولا دخل مزاجكم يعني لازم يكون هبيله علشان تولوه المسؤولة يعني قدها ميزه.

ارجوا ان توصل رسالتي لإصحاب القرار ويحسنوا الإختيار وكفاية الذي صار واربط الفرس جنب الحمار والحليم يفهم.

مكنتاش كدا اتغيرته.