ابكي على امك

ابكي على امك ياجاهل خرج العانة من داخل وابكي على امك ياجاهل خرج البيسة من داخل.

 

ايش يقول الدكتور...؟! استقرار ،استقرار أيش والغلاء قتل الناس وطحنهم طحين فين الإستقرار يادكتور اكيد مش عايش معنا ولاداري لك بالوضع الذي يعيشه المواطن في مدينة عدن.

 

الناس هنا يادكتور عايشين على رواتبهم ولا معهم لا جربه ولا علبه جبتك يامعين تعيننا اجيت يامعين وماصدقت خبر عجنتنا وطحنتنا طحين.

 

الغلاء أحرج كل الأسر خاصة ونحن على ابواب عيد الفطر تخرج الأم والأب يبحثوا عن ملابس يفرحوا بها أولادهم على حساب كل الظروف والمعانات التي تحيط بهم.

 

يادكتور السروال وصل قيمته لعشرين الف ريال والجرامات اقل جرم شبابي وصل قيمته عشرة الف ريال والصنادل والجزمات من سبعة وثمانيه ألف ويزيد.

 

تخرج الشوارع والأسواق تدور لما تحفي اقدامك وانته من دكان لدكان ومن معرض لمعرض تلاقي الأطفال يبكوا ويصرخوا هم واهاليهم من جور الغلاء وقلة مافي اليد والكل في حسرة وألم وبعد كل تلك الجولة يروحوا فارغين وأنت ولا أنت هنا عايش لك في عالم ثاني.

 

خليت الكل حزين على قولتك انك وضع سياسة جعلت كل شيء في عدن مستقر.

 

دكرتنا داك الزمان لما كان يجزع الشرماني والجرادي يبيعوا القماش(البز) في الحوافي والناس كلهم عندهم الامكانية للشراء ايام كانت عدن دولة عظيمة ولا حد يعصي الدولة مش دولة فالتوه.

 

ابكي على امك ياجاهل خرج البيسة من داخل وابكي على امك ياجاهل خرج العانة من داخل.

 

الموظف المدني والعسكري يجري بعد راتبه اشهر لاقدر ولا لقى مصاريف البيت ولاحق العلاج ولاحق المدارس ولا لتغطية هدا الشهر الفضيل وأنتم في متعه وزهوا ونقاهه وسياحة واستجمام.

 

استقرار هههه هبلي امارة هدا الإستقرار كل التقارير الذي تصلكم كاذبة.

 

اليوم نحن في عدن نردد تلك الكلمات ايام الزمن الجميل ايام كانت عدن دولة ابكي على امك ياجاهل.