{أحمر عين}

 

بلا مصلابة ووقاحة وطهوشه وشعبطة وقلة حيا يأحمر عين و كل ماقالو لك الناس استحي على نفسك قليل وسوي لك عرف ونخره يأحمر عين  وسيب واطرح وخلي حق  الناس تقوم تجيب لك خبابير فارغة ومخيطه بصميل وحجج واعذار واهية وتغرر على الناس دحين تحسب نفسك شاطر وأنت اكبر اهبل وبليد وسارق ومبهرر عيونه.

دحين أنته على من تكذب وتدلس وعلى قولة جدتي على من تغري يابسه العري هده عدن وتاريخها واصولها واراضيها وسهولها وجبالها وسواحلها وشواطئها وملاعبها وكل ترابها وممتلاكتها وحدودها معروفه حتى حوافيها وشوارعها وازقتها وابناءها واهلها وساكنيها معروفة من قديم الزمن كان غيرك اشطر في الفهلوه والشيطنه والبلهته والتزوير والنهب والبسط والسلب والتنمر والتجبر على حقوق الدولة وحقوق الأخرين.

ماقدرش عليها البرتغال ولا عمك هنس بقوته وجبروته وكل ماتملك امبراطورية التاج من إمكانيات وهي من كانت تسمى الإمبراطورية التي لا تغيب عنها الشمس ولا عفاش وجنوده وهيلمانه وصولجانه وكل ما أوتي من قوة ونفوذ.

وانته اجيت محشر ومبهرر تشتي تستولي عليها وتجيب لك حجج واعذار وتخوف الناس وكأنك جنية العقبة وطاهوش  وبعبع وورابة نص الليل هي انتبه لنفسك أنت ومن معك واللي يشجعك شوفك في عدن البركان الثائر إنتبه لاتخلي رجلك تزيد على يدك هده نصيحه قبل ما يكسروا شرفك أبناء عدن زيما كسرو شرف بريطانيا العظمى وعفاش والحوثي (يالله شلوه) شل نفسك دلا دلا وارجع حيث ماكنت بلا شوشره وهدره كثير محد يبيع المي بحافة السقاين(الورادين) وخلي لك عبرة بأصحاب الطرابيش الحمر خرجوهم آباءنا أجدادنا من أرضنا وهم صاغرين في يوم الثلاثين من نوفمبر عام67م وغيرهم من الغزاة والمحتلين وزي ماقال الشاعر الشعبي الكبيرمسرور مبروك عوض اللحجي من دخل بالغصب بايخرج بالصميل ومن اخد حق الناس بالقوة وبالغصب وبالمكر والحيلة واستغلال الظروف التي تمر بها عدن بانسترده بالقوة .

#المريسي.